Pastrohen mbetjet industriale
Prishtinë, 25 gusht - Programi i Kombeve të Bashkuara për Zhvillim (UNDP) do të mbyllë zyrtarisht nëser projektin Pikat e Zeza në Artanë.
Të pranishëm do të jenë Ministri i Mjedisit dhe Planifikimit Hapësinor, Mahir Yagcilar, Ministrja e Energjisë dhe Minierave, Justina Pula Shiroka, përfaqësuesë të qeverisë donatore, Drejtori i UNDP-së, Parviz Fartash, dhe zyrtarë lokalë.
Projekti Pikat e Zeza (Hot Spots) gjatë kohëzgjatjes trivjeçare siguroi një përparim të dukshëm në pastrimin si dhe zhvillim të qëndrueshëm në pikat e zeza në Stantërg dhe Artanë. Projekti dha kontributin e vet duke ndihmuar përpjekjet e qeverisë së Kosovës në implementimin e politikave mjedisore dhe zhvillimit të qëndrueshëm sipas standardeve evropiane.
Projekti është financuar nga qeveria e Holandës me vlerë prej 1, 610.000 US dollarë dhe është drejtuar nga UNDP.
