Prishtinë, 26 gusht - Kompanitë që merren me prodhimin dhe përpunimin e pemëve, po arrijnë që në tregun vendor të sjellin prodhime cilësore, me standarde të larta evropiane.

Krejt kjo falë investimeve të vazhdueshme, që këto agrobiznese po i bëjnë për instalimin dhe përmirësimin e kapaciteteve përpunuese.

Njëra nga këto është edhe kompania “MOEA”, në fshatin Kravaricë të Gjilanit, e cila sot ka përuruar linjën e re të përpunimit të pemëve, që kap vlerën prej rreth 600 mijë euro.

Në këtë përurim, ishte i pranishëm edhe ministri i Bujqësisë, Blerand Stavileci, i cili vlerësoi se ky projekt dhe shumë projekte të tjera si ky, për përpunimin dhe marketingun e prodhimeve bujqësore, kanë dhënë efekte të shkëlqyera në këtë sektor.

“Këto projekte kanë pasur impakt edhe në rritjen e prodhimit bujqësor, në rritjen e punësimit në rajonet ku edhe operojnë këto agrobiznese, e po ashtu kanë pasur ndikim edhe në zëvendësimin e importit të prodhimeve bujqësore”, tha ministri Stavileci.

Ai tregoi se agrobizneset në sektorin e pemëve dhe perimeve, të qumështit dhe të mishit, përmes projekteve të tilla, kanë pasur përmirësime të dukshme edhe në zgjerimin e kapaciteteve prodhuese dhe përpunuese.

Në anën tjetër, përfaqësuesi i BE-së në Kosovë, Christof Stock, tha se projekti për instalimin e  linjës së re të procesimit në këtë kompani, ka ndikuar që prodhimet e saj të jenë natyrale dhe kualitative.

“Përmes këtij projekti do të arrihen edhe standardet evropiane në prodhimet bujqësore kosovare, që do t’i ndihmojë shumë kompanisë që në të ardhmen të eksportojë prodhimet e veta edhe në tregun evropian”, tha Stock.

Ndërsa, sipas pronarit të kompanisë “MOEA”, Armend Malazogu, me realizimin e këtij projekti kanë arritur që të rrisin prodhimtarinë, duke zbatuar standardet më të larta evropiane.

“Kemi arritur që të ngrisim kapacitetet përpunuese sipas standardeve më të avancuara evropiane dhe po ashtu kemi realizuar edhe një kampanjë marketingu të prodhimeve tona bujqësore”, tha Malazogu.

Ndryshe, kompania për prodhimin dhe përpunimin e pemëve, “MOEA”, për instalimin e linjës së re të procesimit, është përkrahur me shumën prej rreth 448 mijë euro prej Komisionit Evropian.