Tiranë, 10 maj - Konfindustria vlerëson, se ndërhyrja e Bankës së Shqipërisë (BSH) në tregun valutor, për të përballuar zhvleftësimin e fortë të Euro-s kundrejt Lek-ut do të ishte pa asnjë ndikim dhe do të përfundonte në humbje të rënda dhe të panevojshme financiare.

Ndihma e domosdoshme afatshkurtër për kategoritë e prekura të bizneseve sipas Konfindustrisë duhet të kryhet nëpërmjet një paketë të jashtëzakonshme financiare të qeverisë.

"Përfundimi i mësipërm vjen duke patur parasysh mënyrën e sotme të ndërtimit dhe funksionimit të sistemit ekonomik dhe financiar kombëtar si dhe varësinë e fortë të tij në natyrën në masë të madhe informale të flukseve valutore të huaja", thekson Konfindustria.

Në harkun e një viti financiar 2022-2023 monedha Euro është zhvleftësuar në mbi 9% kundrejt Lek-ut duke prekur rëndë industritë dhe prodhimin vendor dhe sidomos eksportet shqiptare.

Vetëm industria e manifakturës përllogaritet të ketë humbje mbi 200 milion euro nga mbiçmimi i panatyrshëm i Lek-ut.

Grupet e bizneseve importuese janë përfituesit kryesorë të dobësimit të tejskashëm të sforcuar të Euro-s kundrejt Lek-ut.