Refuzohet emërimi i anëtarëve të Bordit të Hekurudhave
Prishtinë, 30 mars - Komisionit për Ekonomi, Tregti, Industri, Energjetikë, Transport dhe Telekomunikacion të Kuvendit të Kosovës në mbledhjen e sotme, të kryesuar nga Et’hem Çeku, nënkryetar i parë i komisionit, u shqyrtua Projektligji për Miniera dhe Minerale.
Komisioni pasi që shqyrtoi raportin final të grupit punues, vendosi që të gjitha amendamentet e propozuara të inkorporohen në Projektligj.
Projektligji për Miniera dhe Minerale parasheh të ketë 87 nene, dhe komisioni vendosi që mbi bazën e punës së deri tashme që ka bërë grupi punues, të vazhdoj diskutimet në një nga mbledhjet e ardhshme, për të harmonizuar qëndrimet rreth Projektligjit.
Në mbledhjen e sotme komisioni shqyrtoi edhe rekomandimin e Qeverisë, për emërimin e anëtarëve të Bordit të Autoritetit Rregullator të Hekurudhave në Republikën e Kosovës.
Duke pasur parasysh që këto propozime ishin të ngjashme me propozimet që ishin bërë më parë dhe që ishin refuzuar , komisioni vendosi që ato të mos përkrahen as sot.
Në fund komisioni vendosi që Projektligji për masat Antidamping, të kalojë në procedura të mëtutjeshme për miratim në Kuvendin e Kosovës, pasi që ka kaluar të gjitha procedurat paraprake.
