Prishtinë, 5 prill - Në një njoftim për media Ministria e Zhvillimit Ekonomik  ka bërë të ditur se Qeveria e Republikës së Kosovës është e përkushtuar për realizimin e reformave në fushën e ekonomisë me qëllim garantimin e qëndrueshmërisë se zhvillimit ekonomik.

Në këtë kontekst, Qeveria është e angazhuar në avancimin e reformave strukturore të ekonomisë së Kosovës, si dhe krijimin e një modeli tregu të standardeve Evropiane dhe të gatshëm që të përballojë konkurrueshmërinë e tregut te BE, ku ne synojmë të bëhemi pjesë në të ardhmen.

Gjithashtu fuqishëm angazhohemi për rritjen e konkurrueshmërisë, fuqizimin e sektorit privat, gjenerimin e punësimit, krijimin e ambientit të sigurt dhe stabil për biznes dhe përmirësimin e imazhit të Kosovës për investime.

Nga ana e vet, Qeveria ka ndërmarrë të gjitha masat të cilat do kontribuojnë krijimin e kushteve sa më të volitshme për funksionim të PTK-së duke aprovuar planin e biznesit të PTK-së, ka bërë ndarjen e Postës nga Telekomi, i cili do të privatizohet, dhe ka përshëndetur gatishmërinë e Bordit të Drejtorëve të  PTK-së për zvogëlim të shpenzimeve operacionale të Postës dhe Telekomit të Kosovës në nivel të shpenzimeve të ndërmarrjeve të tjera simotra në regjion.

Ne gjithashtu përshëndesim vendimin e Bordit të Drejtorëve për  zgjedhjen e kryeshefit menaxhues të Telekomit të Kosovës dhe MZHE shpreh përkrahjen e plotë të gjitha vendimeve të Bordit të Drejtorëve dhe menaxhmentit të cilat kanë për qëllim rritjen e vlerës të aseteve të kompanisë.

Qeveria dhe Ministria e Zhvillimit Ekonomik fuqishëm angazhohen për të siguruar respektimin maksimal të vendimeve të Kuvendit dhe Qeverisë së Republikës së Kosovës, ligjeve në fuqi duke siguruar transparencë të plotë të procesit të privatizimit të Telekomit të Kosovës, në të mirë të qytetarëve të vendit dhe ruajtjen e vlerës së aseteve të kompanisë.