Prishtinë, 4 qershor - Agjencia e Kosovës për Produkte dhe Pajisje Medicinale i dha me datën 03.06.2014, kompanisë vendore “GENTIPHARM” Certifikatën e PMP - Praktika e Mirë e Prodhimit (GMP – Good Manufacturing Practices) në bazë të Ligjit për Produkte dhe Pajisje Medicinale 04/L-190 dhe Udhëzimit administrativ 16/2013.

Inspektimet për PMP janë inspektime mjaft specifike dhe janë realizuar në bazë të konsultave të vazhdueshme të cilat Inspektorati Farmaceutik i ka marrë nga inspektorët Znj.Zofia Ulz – Kryeinspektore e Inspektoratit të Polonisë dhe Znj. Monika Macisowicz, të angazhuara në kuadër të projektit TAIEX, i cili është përfituar nga Ministria e Shëndetësisë për ngritjen e kapaciteteve të Inspektoratit, me angazhimin e veçantë të Ministrit të Shëndetësisë, Prof. Dr. Ferid Agani.

Më pastaj, janë realizuar trajnime të inspektorëve të AKPPM-së në Londër, Varshavë, Barcelonë si dhe trajnimet të tjera të realizuara në Prishtinë, ashtu që AKPPM ka arritur që të tregojë kompetencë në realizimin dhe përmbushjen e detyrave të punës në Inspektoratin Farmaceutik.

Kjo është një e arritur e madhe si për AKPPM dhe Ministrinë e Shëndetësisë ashtu edhe për prodhimin vendor, pasi që po arrihet përmbushja e standardeve më të larta të parapara edhe me legjislacionin evropian sa i përket prodhimit në fushën e farmacisë.

Pas një periudhe disa mujore të inspektimeve të bëra fillimisht nga inspektorët e AKPPM-së, dhe pastaj në bashkëpunim të inspektorëve të Inspektoratit nga Polonia, në fund u arrit që të përmbushen të gjitha standardet e parapara për fillimin e kësaj veprimtarie për të cilën AKPPM beson se do të zgjerohet edhe më tej,  duke ofruar produkte medicinale kualitative, efikase dhe të sigurta për të gjithë qytetarët e Republikës së Kosovës.