Prishtinë, 1 shkurt - Presidentja e Republikës së Kosovës, zonja Atifete Jahjaga, priti sot në takim ambasadorin e Republikës së Francës në Kosovë, zotëri Jean François Fitou.

Presidentja Jahjaga dhe ambasadori Fitou biseduan për zhvillimet aktuale në Kosovë dhe në veçanti për procesin e përmbylljes së fazës së mbikëqyrjes së pavarësisë.

Ambasadori Fitou theksoi se Kosova dhe gjithë rajoni, ka perspektivë evropiane dhe theksoi nevojën e thellimit të reformave në vend.

Presidentja e Republikës së Kosovës, zonja Atifete Jahjaga, tha se faza e përmbylljes së mbikëqyrjes së pavarësisë shënon një sukses të institucioneve dhe të qytetarëve të Kosovës si dhe të bashkësisë ndërkombëtare.

Ajo tha se Kosova shtet sovran dhe i pavarur duhet ta ketë të qartësuar rrugën evropiane dhe e vlerësoi  fillimin e dialogut për vizat.

Presidentja Jahjaga tha se marrëdhënia kontraktuale me BE-në do ta ndihmonte Kosovën në rrugën e integrimeve evropiane. 

Ajo tha se dialogu i Republikës së Kosovës dhe Republikës së Serbisë me ndërmjetësimin e BE-së duhet të ofrojë zgjidhje evropiane të cilat duhet  të garantohen nga Bashkimi Evropian.