Shkruar nga Selatin Kaçaniku

54% e konsumatorëve të Kosovës (sipas statistikave më të reja rreth 28%) nuk kanë mundësi të shijojnë ndrrimin e moteve si të tjerët. Rreth 18% e konsumatorëve (sipas statistikave më të reja rreth 9%) nuk kanë mundësi t i paguajnë as: energjinë elektrike, shërbimet komunale… as miellin e bukës së gojës, as medikamentet?

Edhe ata janë Kosovë?!

Edhe këta shtetas, qytetarë ( në rolin e votuesit / zgjedhësit / elektoratit ) me votën e tyre fuqizuan këtë Aparat Shtetëror  duke ia deleguar autorizimet kompetencat… Po këta qytetarë, në rolin e konsumatorit taksapagues dhe gjenerues kryesor të Buxhetit të Kosovës, këtë vit që po e lëmë pas, bashk me të tjerët, mblodhën 1.5 MLRD € për mirëqenien e Shtetit, të Shtetasit, të Popullit, të Qyetarit…të Konsumatorit.

Ata nuk e merituan as nuk e zgjodhën “perspektivën“ e varfërisë?!    

Pra, konsumatori është punëdhënës dhe ligjërisht është ai që  duhet të vlerësojë cilësinë e shërbimeve të Shtetit, t i  vlerësojë  performansat e Institucioneve, të Asociacioneve, të Mekanizmave…të Shtetit – gjë që nuk i mundësohet, nuk i lejohet kurrë?!

1/3 e të gjithë të punësuarve në Kosovë  ndodhen në Administratën e Aparatit/Administratës së  Shtetit. Ata hanë bukë nga duart e konsumatorit të cilin nuk e njohin në asnjë trajtë ?!     

Konsumatori  pra është trajta e shfaqjes së qytetarit i cili duhet të  konsultohet, të cilit duhet t i raportohet. Por kjo  nuk po ndodhë, nuk ndodhi as këtë fundvit. Institucionet, disa parti politike, as zyrtarët e liderët e tyre as sivjet nuk qenë të vetëdijshëm se vlerësimet e arritshmërisë, të performansave, vlerësimet e arritjes së strategjive, të plan-programeve e të premtimeve i bën ai të cillt i janë dedikuar (konsumatori pra) dhe ai i cili paguan (prap konsumatori  taksapagues).

Çdo Ministri e ka konsumatorin e vet të cilit ia dedikon produktin e punës, por?!

Vetëvlerësimet, që u dëgjuan këto ditë, me faktorizim  kaq të lartë “ të  të arriturave “ e duke mos i përmendur pakënaqësitë tona eventuale, dështimet e mundshme (bile-bile disa të përcjellura edhe me skandale), premtimet e parealizuara, standardet e papërmbushura, cilësitë e paarritura në krahasim me shtetet e rajonit ose shtetet me konstrukt të ngjajshëm me Kosovën…janë  VETËKËNAQËSI, ishin ofenduese.

Dëshprimi ynë është edhe më i madh nëse kemi parasyshë  faktin se vetëlavdërimi dhe vetëkënaqësia nuk i ushqejnë shpresat tona as mundësitë për vitin e ardhëshëm 2013 ?!  Edhe shpenzimet e dollive të vetëlavdërimit e të vetëkënaqësisë i pagoi konsumatori taksapagues, a janë të vetëdijshëm ?!  

Duke uzurpuar këtë të drejtë tonën me VETËKËNAQËSI E ME VETËLAVDËRIM, rrjedhimisht imponohet dyshimi dhe ndjenja e hidhur se jemi të anashkaluar dhe të diskriminuar ?!

Po detyrohemi që të drejtat tona  t i imagjinojmë e ëndërrojmë, të shpresojmë si fëmijë ( fëmijët janë konsumatorët më të Mëdhenjë ) se të drejtat tona, për Vit të Ri, do të na i sjellë e dhurojë Babadimri ?!   

 Institucionet,  Asociacionet,  Mekanizmat…e Shtetit  komunikojnë me konsumatorin vetëm nëpërmes  mbledhjes së taksave e tatimeve, nëpërmes fushatave dhe mediumeve të informimit (show medial).

Nuk mbajmë mend që ndonjë nga Institucionet,  Asociacionet,  Mekanizmat…e Shtetit të ketë kontaktuar drejtëpërsëdrejti me konsumatorin taksapagues, të ketë përmbushur obligimet ligjore ndaj tij ose, të paktën, së bashku me të t i ketë shqyrtuar e analizuar të arriturat, performansat?!    

Edhe sivjet ndodhi përsëritja, shfaqja e njëjtë mediale: Vetëlavdërimi për shërbimet ndaj qytetarit konsumator e taksapagues si sindrom psikologjik  institucional e individual;  Mosnjohja  e punëdhënësit e finansuesit (mosnjohja ose injorimi i atij që paguan për shërbimet e administrates së Shtetit në nivel Qerndror e Komunal), e që është konsumatori-taksapagues dhe gjenerues kryesor i  Buxhetit; “ Zbulimi “ i karakterit të vërtetë të Institucioneve, të Asociacioneve, të Mekanizmave…të Shtetit, të Partive Politike si dhe të zyrtarëve, të menaxherëve e shefave  të tyre. Kështu, ata  dëshmojnë  se  kanë diç për të  fshehur?!     

Tentim mbyllja e gojës së KONSUMATORI-t edhe në këtë formë deri te kërcënimet e ndryshme dëshmon se të gjithë  këta e duan vetëm xhepin dhe paranë e konsumatorit  por  jo konsumatorin e vetëdijësuar – cilësi kjo që për krijimin dhe arritjen e së cilës ligjërisht obligohen po këta tituj të apostrofuar ?!  

Asnjë Buxhet,  Strategji, Plan-program, Projekt…akoma nuk është hartuar as miratuar në bashkpunim, duke e diskutuar ose duke ia përshtatur të drejtave, intereseve, nevojave, shijeve…dinjitetit të konsumatorit. “ Ata “ pretendojnë se i dine të gjithat, edhe shijet, nevojat e kërkesat tona. Ndërsa, për votën tone premtonin diç tjetër dhe diç ndryshe ?!

Kishim pasur dëshirë tepër të madhe të na  mundësohet t I kontribuojmë edhe më shumë zhvillimit të Kosovës dhe ngritjes së mirëqenies sonë – standardit tone jetësor:  Do të kontribuonim me trefishimin e  Buxhetin e Kosovës – Dhuratë për Vitin e Ri, njësoj si  të ishte konsumatori Babadimër i Shtetit të Kosovës ?!
     
Ky mosinteresim, mbyllja ose mos hapja ndaj  qytetarit - konsumator e taksapagues, mungesa e transparencës dhe e përkushtimit dëshmon për rolin, etikën dhe për seriozitetin e nivelit jo të mjaftueshëm; Dëshmon për shkëputjen e kësaj shtrese politike/institucionale nga qytetari – konsumatori, dëshmon  për një lloj autarkie… ?!  

Në këtë lëmsh administrate të tejngarkuar Qendrore e Komunale, tmerrësisht tepër të burokratizuar, të politizuar e të sunduar partishë e me veçori nepotiste; Në këtë Vorbull konfliktesh interesi, korrupsioni  e veprimi ligjesh rreth shkallës 30 %; Në këtë klimë të cilës i mungon kriteriumi i vlerës e abuzimet arsyetohen me meritokraci; Në këtë frymë politike ku Partitë dhe Institucionet na ndajnë e përçajnë sepse nuk jemi “ me këta “ por paskemi zgjedhur anën e gabuar po ndjehemi të zhvatur, të përçarë, të diskriminuar….si në një shtet të huaj, me institucione të huaja, me politikanë të huaj, me…tepër shumë paralelizma e me tepër shumë kontrabandime: Edhe të udhëheqësve,  të koalicioneve, të pushtetit,  të kufirit,  të ligjeve, të standardeve,  të të drejtave, edhe të…?!

Konsumatori, klienti, pala…të gjitha trajtat e shfaqjes së qytetarit në shoqëri e në tregun e prodhimeve, mallrave e shërbimeve ndjehet peng i keqmenaxhimeve e abuzimeve, të cilat na  pengojnë  edhe  lëvizjen e lirë si brënda ashtu edhe  jasht Shtetit.

Duke i dëgjuar prononcimet e Shefave të Shtetit, të zyrtarëve, të…menduam se ata flisnin për përvojat ose për të arriturat në një shtet tjetër. Menduam se ishim duke ëndërruar një ëndërrr / shëmbull të bukur nga të përzgjedhurit tanë ( të ndihmuar pak me vota të manipuluara…e tha vet Kryeparlamentari ?! ).

Realisht, kudo ku shfaqemi në rolin dhe veprimin konsumator ndjehemi keq sepse ndjejmë prani të pamjaftueshme të Shtetit dhe të  veprimin e Ligjit.

A thua vallë të gjitha (vet)lavdëratat ishin vetëm dhuratë e Vitit të Ri, sa për të ëndërruar e për të krijuar  iluzion, sa për të përqafuar me më shumë dashuri e optimizëm Vitin e Ri 2013  ?!

Po, por Babadimri i vërtetë nuk sjellë qese as pako bosh, pa dhurata. Fundja, edhe Babadimri është mit e përrrallë, se i vërteti nuk ekziston. E, ne jemi rritur, nuk jemi më fëmijë – vetëm po na trajtojnë si fëmijë ?!