Athinë, 18 shkurt - Qindra punonjës të sektorit shtetëror në Greqi vazhduan për të dytën ditë protestat në Athinë kundër masave të reja në përgjigje të krizës financiare.

Punonjësit e doganeve në Athinë filluan dje një grevë 3-ditëshe. Punonjës të tjerë të sektorit shtetëror kanë planifikuar greva më të shkurtra.

Punonjësit po protestojnë kundër uljes së pagave dhe vendosjes së taksave të reja në kuadrin e nismave të gjera qeveritare me synimin për të frenuar problemet ekonomike.

Ministrat e financave nga 16 vende që përdorin euron kanë shprehur shqetësimin se problemet ekonomike të Greqisë do të ulin ndjeshëm vlerën e euros.

Dje, këta ministra e paralajmëruan Athinën të ulë deficitin në 8.7 për qind këtë vit. Ata thanë gjithashtu se Greqia do të duhet të ndërmarrë masa të reja për uljen e shpenzimeve deri në mes të marsit, nëse reformat e deritanishme nuk e ulin sa duhet deficitin.