Fillon konferenca e komisioneve parlamentare për Buxhet e EJL-së
Prishtinë, 11 tetor - Komisioni për Buxhet dhe Financa i Kuvendit të Republikës së Kosovës, më 10, 11 dhe 12 tetor, organizon në Prishtinë Konferencën e parë të komisioneve parlamentare për Buxhet të vendeve të Evropës Juglindore (EJL), me temën “Roli i parlamenteve në procesin buxhetor”.
Një ditë para fillimit të Konferencës së komisioneve parlamentare për Buxhet të vendeve të Evropës Juglindore, në hollin e Kuvendit të Kosovës është zhvilluar një ceremoni mirëseardhjeje për pjesëmarrësit e kësaj Konference.
Në prani të anëtarëve të komisioneve parlamentare për Buxhet të vendeve të rajonit, ambasadorit gjerman në Prishtinë, Hans-Dieter Steinbach, përfaqësuesve të GTZ-së, deputetëve të Kuvendit të Kosovës – anëtarë të Komisionit për Buxhet dhe Financa, si dhe mysafirëve të tjerë, anëtari i Kryesisë së Kuvendit, Xhavit Haliti, ka mbajtur një fjalë përshëndetëse.
Duke iu uruar mirëseardhje, në emër të kryetarit të Kuvendit të Republikës së Kosovës dhe në emër të Kryesisë, Haliti ka uruar që Konferenca e cila fillon nesër, të jetë një nismë e mbarë për rajonin dhe për komisionet përkatëse.
Ai tha se Kosova si shtet i ri dhe parlamenti i saj, në vend të diplomacisë parlamentare, e cila nuk është arritur të realizohet sa duhet, kanë ndërmarrë një nismë të kontakteve, e cila për të gjitha palët, për Kosovën dhe shtetet e tjera pjesëmarrëse në konferenca të tilla, do të shërbejë për njohje dhe bashkëpunim për interesa të përbashkëta.
Në këtë konferencë do të marrin pjesë anëtarë të Komisionit për Buxhet dhe Financa të Kuvendit të Kosovës, përfaqësues të institucioneve të vendit, përfaqësues të komisioneve për buxhet të vendeve të Evropës Juglindore dhe atij të Gjermanisë, si dhe zyrtarë të tjerë të lartë ndërkombëtarë, të akredituar në Prishtinë.
