Dështon bashkimi i Alpha Bank me Eurobank
Athinë, 5 prill - Ka dështuar përpjekja për krijimin e një banke të fuqishme greke që do të renditej ndër më të mëdhatë në Europë.
Alpha bank bëri të ditur se do të thërrasë mbledhjen e jashtëzakonshme të asamblesë për ndërprerjen e procedurave të bashkimit të dy bankave.
Alpha Bank e ka argumentuar vendimin e vet me pasojat nga reduktimi i borxhit (PSI), duke theksuar se nga ky proces do të rezultonte një dëm shtesë prej 9 miliardë eurosh, nga bashkimi me Eurobank.
Alpha shton se do të nevojitej një shtesë e paarritshme kapitali aksionesh me vlerë 3,9 miliardë euro dhe se në çdo rast shtesa e kapitaleve të formatit të unifikuar do të ishte e pamjaftueshme.
Nga ana e vet, Eurobank ka theksuar në reagimin e vet se pretendimet me të cilat Alpha Bank tenton të justifikojë mosrepsketimin e detyrimeve të veta janë pa bazë.
Përjekjet për bashkimin e dy bankave filluan në gusht 2011, kur u publikua marrëveshje e tyre për krijimin e një banke të përbashkët, që do të ishte më e madhja në Europën Juglindore dhe e 25-a në nivel europian. Banka e re do të kishte një kapital aktiv afro 150 miliardë euro, total depozitash 80 miliardë euro, një rrjet me më shumë se 2.000 filiale dhe 8 milionë klientë.