Prishtinë, 18 korrik - Temperatura të larta, mot i nxehtë, por rreze edhe më të nxehta dielli do të na shoqërojnë për të gjithë javën në vazhdim.

Termometri i sinoptikanëve do të vijojë të regjistrojë temperatura të larta, njësoj si javën që lamë pas. Fundjava ka qenë e “zjarrtë”, ashtu si dhe në vende të tjera të Europës, që ndodhen nën trysninë atmosferike të rrymave afrikane, që së fundmi po qarkullojnë edhe në rajonin tonë.

I nxehti afrikan që ka pushtuar vendin do të na shoqërojë, së paku, deri në fundjavën tjetër. Sipas meteorologëve, temperaturat do të vijnë në rritje. Ashtu si dje, edhe sot, meteorologët parashikojnë temperatura tepër të larta dhe pritet që termometri të shënojë 40 gradë Celsius.

“Temperaturat do të vazhdojnë të jenë të larta. Pritet të jemi me mot të kthjellët dhe me këto vlera të temperaturave deri në datën 24 korrik. Duke nisur nga e enjtja e javës tjetër, ne presim të kemi një rënie, por ajo do jetë me 3-4 gradë, pra jo shumë e ndjeshme”, ka sqaruar sinoptikania e institutit të parashikimeve “Meteoalb”, Lajda Porja.

Vala e të nxehtit afrikan, tashmë e pranishme në vend, ka përfshirë një pjesë të mirë të Europës, ndërsa epiqendra është Italia, vend që po gjendet nën trysninë e temperaturave të larta. Në këto kushte, edhe “viktimat” e vapës përvëluese janë të konsiderueshme.

Sipas bilancit statistikor, të kryer ditët e fundit pranë qendrës spitalore universitare “Nënë Tereza”, rezulton që çdo ditë, në urgjencën e pediatrisë, paraqiten nga 150-200 raste fëmijësh të sëmurë. Këto shifra, vetëm gjatë 24 orëve.


Po ashtu, urgjenca e kardiologjisë pret dhe përcjell brenda një ditë-nate nga 100 deri në 150 pacientë me probleme kardiake, luhatje të tensionit apo shqetësime të tjera.

Një tjetër shërbim me fluks pacientësh është edhe pavijoni i infektivit. Për shkak të virozave, helmimeve, problemeve me temperaturën e lartë, viroza të stinës dhe shqetësimeve të tjera stinore, në këtë repart paraqiten çdo ditë nga 60-80 qytetarë.
Këshillohet dalja në mëngjes ose në mbrëmje, pas orës 19:00, qëndrimi në ambiente të freskëta, ajrosja e shtëpisë, veshja e lehtë me materiale të përshtatshme për stinën.

Mjekët këshillojnë konsumin e lëngjeve, frutave, ushqimeve me pak kalori, pa yndyrë, sheqer, sa më pak alkool dhe duhan. Ruajtja dhe konsumi i ushqimeve, sipas kushteve të nevojshme. Është i nevojshëm konsumi i të paktën dy litrave ujë në ditë.