New York, 07 maj -  Ligjvënësi demokrat nga New Yorku, Eliot Engel, bashkëkryetar i Grupit për Çështjet Shqiptare në Kongresin amerikan, duke komentuar zhvillimet në Kosovë, lidhur me korrupsionin, ka vlerësuar se çështja e imazhit është e rëndësishme për Kosovën.

Korrupsioni është problem ka deklaruar Engel, duke potencuar se në Ballkan lufta ndaj kësaj dukurije duhet të vazhdojë. Kongresisti amerikan tha se ka folur me kryeministrin Hashim Thaçi dhe sipas tij ai ka marrë garancë nga Thaqi se qeveria e tij e shikon me seriozitet problemin e korrupsionit dhe po e lufton atë.

Gjerat në Kosovë, sipas Engelit, po shkojnë mirë, mirëpo korrupsionin gjithmonë duhet çrrënjosur. Duke folur ndërkaq, për zërat që potencojnë mundësinë e ndarjes së Kosovës, si një zgjidhje për marrëdhëniet e saj me Beogradin, Engel ka thënë se kjo është ide e keqe.

"Po të fillosh të shkëmbesh territore në Ballkan, kjo nuk do të ketë fund dhe mund të çojë në luftëra ose vështirësi më të mëdha. Kosova nuk duhet të ndahet. Serbët në Beograd po luajnë një lojë të rrezikshme, çdo hap që hedhin është i kalkuluar", ka thënë Engel.